على فكرة .. الثورة لسة ما نجحتش .. احنا لسة ما تخلصناش من النظام القديم و لا من أعوانه و لا ديوله و لا أي حاجة .. كل اللي حصل تغيير وجوه
مش قادرة أفهم لحد دلوقتي مبارك واكل شارب نايم متعالج في أفخر المستشفيات على حسابنا بمناسبة ايه؟ و كذلك الست حرمه المصون .. مش كفاية عاشوا على دمنا 30 سنة ؟؟؟؟؟؟؟؟؟؟؟؟؟؟!!!!!!!!!!!!!!
الناس دي ليه ما يتحطوش تحت الاقامة الجبرية و يمنعوا من التصرف في أي أموال تخصهم لحد ما نعمل دولة نظيفة و بعدين نبقى نحاكمهم على مهلنا؟ أو ليه ما نعملش محاكمة ثورية و نحكم عليهم بما يتساوى مع جرائم كل واحد منهم؟ أصل الجرايم واضحة و صريحة و موجودة قدام عينينا مش محتاجة أدلة و براهين .
سيبك من مسلسل محاكمات نهب المال العام و التربح من المنصب و الكسب غير المشروع و شوية المسرحيات الهزلية دي.
مش هي دي أهم جرائم الناس دول .. تيجوا نعد مع بعض الجرايم؟ خدوا عندكم :
1- اطلاق الرصاص الحي و المطاطي و الخرز على المتظاهرين السلميين غير المسلحين و قتل أعداد كبيرة منهم و إصابة أعداد أكبر بإصابات لا يمكن الشفاء منها تماما
2- إطلاق الرصاص الحي على الناس في البيوت .. ممكن نراجع كام طفل مات في بلكونة بيته أو حتى داخل البيت بسبب الرصاص؟
3- اطلاق البلطجية على الشباب المعتصمين في الميادين
4- اختفاء الشرطة من الشوارع حتى الآن (متواجدة على استحياء) و كل الحكومة الحالية من مجلس عسكري و رئيس وزراء و وزير داخلية مش قادرين ينزلوا الشرطة الشوارع .. في بلد في العالم مافيهاش رجال مرور بعد الساعة 2:00 العصر؟؟؟؟؟؟؟؟؟؟؟؟
5- فتح السجون و إطلاق البلطجية في الشوارع لإرهاب المواطنين
6- قطع الاتصال عن الهواتف المحمولة و قطع الانترنت لمنع الاتصال و لنشر الذعر أيضا
(دي مجموعة من الجرائم الحديثة، نرجع بقى بالذاكرة للخلف شوية)
7- تهريب ممدوح اسماعيل خارج البلاد و افساد قضية العبارة اللي مات فيها شباب زي الورد و أرباب أسر و أطفال و نساء، ده غير ان أصلا ما كانش في أي محاولات لانقاذ الناس بعد غرق العبارة ده غير اختفاء الناجين اللي هم أصلا مش كتير علشان ما يحكوش عن المهزلة
8- بيع الغاز لاسرائيل بأقل من الثمن العالمي (مش فاهمة ايه المعضلة في القضية دي؟ مش عارفين يحكموا فيها ليه؟)
9- اتفاية الكويز التي تعد عقد إذعان مدمر للصناعة المصرية و متواطئ مع العدو المهادن ظاهرا و المحارب باطنا مع العلم بأن هناك أسواق كثيرة و أكثر أهمية من السوق الأمريكية كان يمكنها استيعاب فائض إنتاج الملابس
10- الزراعات المسرطنة
11- هدم زراعتي القمح و القطن لصالح محاصيل غير استراتيجية.
12- عدم محاربة تجار المخدرات إلا لدواعي سياسية "منظر يعني علشان نحس انهم بيعملوا حاجة"
13- بيع أصول الدولة بأقل من سعرها الحقيقي لرءوس أموال معادية
و لسة في كتييييييييييييير
لو مافيش أدلة مادية فيه 85 مليون شاهد على الأقل على الجرائم التي حدثت خلال 18 يوم ثورة.
كل الجرائم دي و اللي كلنا عارفينها المنطق بيقول إن رئيس الدولة مدان فيها كلها لأنه المسئول الأول عن كل شئ يجري في هذا البلد و عن عدم معاقبة المخطئ و استبداله بآخر يصلح .. و كل وزير مختص باختلاف الوزارات المتعاقبة يدان بالجرائم الخاصة بوزارته .. و لو في أمور فيها اختصاص مشترك يبقى يتقاسموا فيها .. مش معضلة هي .
أعتقد إني مش عبقرية و لا ذات فكر مثلا علشان أوصل للنتيجة دي و تعجز عقول الجهابذة اللي فوق عن الوصول ليها.
مش كده و لا ايه ؟؟؟؟؟؟؟؟؟؟؟؟؟؟؟؟؟؟؟
ليست هناك تعليقات:
إرسال تعليق